يبدو أن صبر السيد “محمد زين العابدين” قد نفذ، و رغم ما عرف به الرجل من دماثة أخلاق و رصانة و وطنية فإن تواتر الأحداث الأخيرة عليه و تعمد الوزيرة “شراز العتيري” التشكيك في انجازاته، بل أكثر من ذلك، فقد وصل بها الأمر إلى إلى اتهامه بسوء الحوكمة.
يبدو أن السيدة الوزيرة ارتأت أن ذلك هو الطريق الأمثل حتى تصنع لنفسها صورة المتعففة و الحكيمة، و ذلك ما دفعها إلى رمي سلفها بكل النعوت. و قد كان الرد من طرف وزير الثقافة السابق قاسيا، ونرده لكم مثلما وجدناه في تدوينة له: “يا شيراز العتيري:
1- انا ثقة ممكن تبنيها بعد الإبادة الجماعية اللي قمت بيها ضد أبرز كفاءات وزارة الشؤون الثقافية اللي اليوم يلقاو أرواحهم ممنوعين من العمل … بتعلة خدموا مع الوزير السابق؟
2- انا ثقة ممكنة بعدما ألغيت أهم التظاهرات الكبرى و الإحداثات الجديدة بتعلة تابعة للوزير السابق ؟
3-أنا ثقة تحب تبنيها و المعطيات اللي تقدم فيها كلها منقوصة للرأي العام و موجهة !
4- وين الميزانية الإضافية اللي خليناها و قيمتها 51 مليارا زيادة في 2020 مقارنة ب2019؟ شبيك بعمرك ما تحدثت عنها؟ 351 مليار صرف خلينا، وينهم؟
5- تتحدث عن الديون، و نسيت الديون اللي خليتها إنت كمديرة عامة للمركز الوطني للسينما والصورة 2018 و 2019 في أيام قرطاج السينمائية؟ شبيك عمرك ما حكيت عليها؟ نعطيك أمثلة أخرى للتصرف في CNCI؟
6- بالمنطق متاعك، نلغيو دورة JCC 2019 خاطر تجاوزنا ميزانية 2018؟ ونلغيو JCC 2020 خاطر تجاوزنا ميزانية 2019؟ و إنت هي شيراز العتيري اللي خليت الديون هذي؟ تو هذا كلام؟
7- أنا ثقة تتحدث عنها و إنت تقول إن الديون المتخلدة تخص الفنانين و المبدعين، و الحقيقة أن نصيبهم منها قليل جدا، أغلب الديون في علاقة بالمزودين من المؤسسات العمومية و الخاصة؟ علاش هذا التوظيف ؟
8- عمركشي سمعتني نتحدث أنا عن الديون اللي خلاوهالي الوزراء اللي سبقوني و جانب يخص حتى ديون 2012 ؟ فما مبدأ احترام الدولة و مفهوم تحمل المسؤولية و استمراريتها كان ما في بالكش!
9- انا ثقة تتحدث عنها و إنت عمرك ما ذكرت الفواضل اللي خليناهم وهي في حدود 41 مليارا لفائدة ميزانية 2020، و اللي يمكن يغطيو جانب كبير من المتخلدات؟
10- ثقة شنوة اللي تحكي عليها و أهل الثقافة اليوم في ديارهم ما لقاوش شكون يدافع عنهم، بطالة و خصاصة و لا حياة لمن تنادي……حتى المهرجانات اللي متعودين عليهم قرطاج و الحمامات مرة ايه مرة لا مرة لا ايه لا لا …. وين ماشين؟
11- انا ثقة تتحدث عنها و انت تحب تتجاهل أن أكثر فترة عرفت فيها وزارة الشؤون الثقافية عملا هيكليا و إحداثات و مؤسسات جديدة دولية و وطنية و جهوية و أكبر عدد من التظاهرات في جميع الفنون و إحداثات هي السنوات الأخيرة …. موش الكلام هذا انت اللي كنت تقول فيه ؟ ! تحب نذكرك؟ في شكون نغالطو اليوم ؟
12- اللي يحب يبني الثقة يقر بالحقيقة و انو حكومة الفخفاخ نقصت في ميزانية وزارة الشؤون الثقافية من جراء وباء الكورونا، و هذا اللي يجعلها اليوم عاجزة عن الإيفاء بالتعهدات القادمة. الصدق ينجي و أهل القطاع يمكن يتفهموا الظرف و الصعوبات كان تتقاللهم الحقيقة دون تعلات أو مبررات واهية!
13- اما الثقة عندها ناسها، امشي لكل الجهات و تحدث مع كل الأطياف السياسية و الجمعيات تو يحدثوك عن الثقة اللي بنيناها مع بعضنا خلال السنوات الأخيرة…..قبل ما تلقى الوزارة نفسها في الوحل هذا …… والله غالب !
