هاحمت الممثلة و المنتجة سنية بالقاسم إعلامي معروف و إتهمته بالتحيل على الفنانين وفي مايلي نص التدوينة
بتز الفنانين وحش السجون و 🐎 الشاشة يعود بعمليات تحيل ضخمة
ايه يا سيدي اليوم باش نحكوا على حصان الشاشة ووحش السجون كيفاش قاعد يتحيل على الفنانين و يبتز فيهم .
بدات الحكاية قبل شهر رمضان اتصل بي صحفي قالي معاه فريق كامل يخدم على الصفحات لكبيرة منهم حصان الشاشة و انت اختار شكون يدعموك من الصفحات و كل صفحة على حسب اشكون صاحبها تدفعلها كي يبدي صفحة كبيرة و صاحبها معروف تاخو عشرة ملاين و يكتب عليك صاحبها عشرة مرات بمعدل نهار بعد نهار في رمضان يبدي يشكر و يمجد فيك ، و قالي انت راك داخلة جديدة لسوق التونسية و الحقيقة قاعد نسمع انه برشة يحضرولك في رواحهم باش يضربوك فكان تحب و تحس روحك برشة عليك خوذ كان الصفحة متاع حصان الشاشة و وحش السجون يرقلك امورك و يدز معك قدام الي قاعد يتحضرلك .
الحق متاع ربي بكل ثقة في النفس جاوبتو قتلو لو اجتمع الانس و الجن باش يضروني ما ينجموش يضروني كان بلي كاتبهولي ربي
و فوق هذا انا اعمالي ما تستحقش الدعم من حتى حد يظهرلي لا انت و لا غيرك وصلتوني لهوني و المسلسل باش يتعرض في التلفزة معناها الجمهور باش يلقاه قدامه كان عجبو تو يتفرج كان ما عجبوش تو ما يتفرجش عادي و زيد ما نتصورش الي وحش السجون عندو عصا سحرية باش يعمي عيون الجمهور .
قالي راك غالطة
قتلو انا مرا درت العالم و اكتسبت خبرة كبيرة من خدمتي في قنوات كبيرة و اليوم رجعت لتونس باش نحارب و ندافع على الفن ما نجمش ندخل في حكايات كيف من هكا
قالي ربي معك
و كنت فرحانة و انا نحارب في المرتزقة كنت شايخة في رمضان علخر و انا هذا نحقروه و هذا نسبوا و هذا نرجعوا لحجمو كنت شايخة محلاه كان شهر رائع و انا ندافع على حاجة نحبها و نأمن بيها عطيتها و عطاتني و المهم ما دفعتلهم حتى فرنك كلبوا و هم يبتزوا فيا و انا شايخة عليهم و فرنك ما تاخذوشي مني يا متحيلين
و في الاخر خسروا جميعا و فرحت بنجاح العمل متاعي و الي حبوا يعملوه في باش يضروني نفعوني بيه 😂😂😂😂😂 لذلك رد بالك يا فنان يتحيل عليك وحش السجون و حصان الشاشة و يقنعك انه هو السبب في نجاح حفلتك في قرطاج . ما تغلطش يا فنان. قرطاج طلعت عليه بعد تعب و جهد سنين وحدك. الجمهور جاك لقرطاج باش يتفرج فيك خاطرك عجبتو و امتعتو جا يستمتع معك
رد بالك يا فنان يتحيل عليك وحش السجون و حصان الشاشة و ينحيلك فلوسك بعد ما تسكرت في وجهو باب النسا و رجال الاعمال دورها فنانين ، يتحيل بحجة ندعم فيك رد بالك ربي وحدو الداعم و المبارك رد بالك تصدقها حكاية الابتزاز الي يعمل فيها رد بالك يحصلك المتحيل
وكان الإعلامي المشار إليه شن عديد الهجمات على عدد من الفنانين على غرار محمد الجبالي
كما تجدر الإشارة إلى أن سنية بالقاسم أثارت كثير من الجدل هذا الموسم الرمضاني بسبب تصريحاتها و الانتقادات التي وجهة لسلسلة الرمضانية التي أنتجتها وتم بثها على القناة الوطنية “للا سندريلا”
